Светскиот ден на фармацевтите (25 септември) е меѓународен ден на фармацевтите, но и на фармацијата како професија. Фармацевтите отсекогаш биле, се, и ќе бидат клучни даватели на здравствените услуги, и како што се проширува делокругот на секојдневните практики и работни задачи, самата фармацевтска професија минува низ трансформација, со што фармацевтската струка станува централна во модерниот здравствен систем. Фармацевтите се способни да одговорат на сите прашања, проблеми, ситуации, максимално професионално и доследно на сите, па и на најмалите предизвици, без оглед дали станува збор за лабораториските истражувања, технолошките процеси, познавањето на природните лекови, но и на пружањето на аптекарската здравствена заштита.
Современиот, глобален тренд ја става фармацијата во специјален фокус на дигиталното здравство и напредните практики и искуства од области како што се дигитална писменост, вештачка интелигенција, телефармација, вакцинација од страна на фармацевтите. Секако дека и технолошките иновативни начини на производство на авангардни системи за транспорт на активните молекули до таргетираните рецептори, се од особен интерес на фармацијата.
Детерминирањето на иднината на фармацевтската струка, и технолошко-производствена, и лабораториска, но пред се аптекарска зависи од нас самите. Инвестирањето во сопственото знаење, учењето на нови вештини, стекнувањето со нови квалификации и компетенции, се клучните моменти со кои ние, фармацевтите можеме да се избориме за нашето, централно место како во јавниот живот, така и во институциите на системот.
Оваа година, на 25ти Септември се одбележуваат 113 години од востановувањето на Интернационалната Федерација на Фармацевтите (International Pharmaceutical Federation (FIP), односно по 16ти пат се празнува Светскиот ден на фармацевтите. Во 2020 година, ФИП ја креираше Светската недела на фармацијата, со што прославата се проширии на цела седмица, подразбирајќи ја целата фармацевтска професија, како и сите нејзини сектори.
Наша морална, етичка и струковна одговорност е да си ја почитуваме професијата и струката 365 дена годишно.
Драги колеги, нека ни е честит празникот !!!
