Вчера во просториите на Владата на РСМ се одржа работна средба посветена на унапредување на позицијата на фармацевтската дејност и нејзината интеграција во здравствениот систем.
На средбата присуствуваа клучни чинители во здравствените политики: д-р Ристо Симеонов, национален координатор за здравство, м-р Весна Ставрова, претседателка на Фармацевтската комора, проф. д-р Катерина Ставриќ од Катедрата за семејна медицина, Билјана Божиновска, претставничка на Здружението на приватни аптеки, како и Снежана Трповска, советничка за социјална заштита во Владата на РСМ и Лидија Цветановиќ, државна советничка во Генералниот секретаријат на Владата на РСМ и координаторка на експертскиот тим за изработка на Стратегијата за транспарентност на Владата, акциски план (2023-2026).
Дискусијата беше фокусирана на неколку клучни аспекти:
- Зајакнување на улогата на фармацевтите
Фармацевтите се клучен стожер во здравствената заштита, а нивната експертиза може дополнително да се искористи за подобрување на квалитетот на здравствената грижа за секој граѓанин. - Аптеките како најдостапни здравствени установи
Овие установи се првата линија на здравствена поддршка за граѓаните. Нивната улога може да се прошири надвор од традиционалната дистрибуција на лекови. - Воведување нови превентивни услуги
Се разговараше за имплементација на услуги кои ќе овозможат подобар мониторинг, превенција и исход од третманите, што директно влијае на здравствените резултати кај пациентите. - Подобрување на безбедноста на пациентите
Преку фармацевтска грижа и намалување на компликациите од неправилно користење на лекови, се подобрува безбедноста и ефикасноста на терапиите.
Заедничка визија
Имаме иста цел: поефикасен здравствен систем и подобри резултати за пациентите. Фармацевтската професија е подготвена да преземе поголем товар во здравствената заштита, придонесувајќи за растеретување на системот и овозможувајќи попрецизна контрола на трошоците и терапиите.
Оваа средба претставува важен чекор кон модернизација на здравствената заштита, каде што секој професионалец ќе работи според своите максимални капацитети за најдоброто на пациентите.
Фармацевтската комора останува посветен партнер во креирањето современ, одржлив и пациент-ориентиран здравствен систем, во кој фармацевтот има активна и видлива улога во грижата за јавното здравје.
