Агенцијата за лекови и медицински средства (МАЛМЕД), заедно со бројни значајни чинители во здравствениот систем на глобално и локално ниво, се приклучува во одбележувањето на неделата за безбедна употреба на лековите – MedSafetyWeek која се одржува од 4 до 10 ноември 2024 година. МАЛМЕД како Национален центар за пријавување на несакани реакции од лековите континуирано спроведува активности за подигање на свеста за важноста и значењето на пријавувањето на несаканите реакции од лековите и промоција на безбедна употреба на лековите.
#MedSafetyWeek е кампања на социјалните медиуми организирана од Упсала Мониторинг Центарот при СЗО која се одржува во ноември секоја година и има различен фокус или тема за да се поттикне пријавувањето на секој сомнеж за несакани реакции од лековите. Темата на годинешната кампања на #MedSafetyWeek е „важноста од користење на лековите на правилен начин за да се спречат несаканите реакции и да се пријават несаканите реакции доколку тие се појават“.
Научните истражувања упатуваат на фактот дека речиси половина од несакананите реакции од лековите може да се спречат.
Превенирањето на несаканите реакции и нивно спречување може да ги поштеди пациентите од значителни страдања како и да ги намали здравствените трошоци.
Ги потсетуваме здравствените работници за значењето на рационалната примена на лековите и ги поттикнуваме заедно со пациентите да го пријават секој сомнеж за несакана реакција од лековите.
Дополнително, пријавувањето на несаканите реакции од лековите може да упатат на постоење нова, претходно неутврдена, несакана реакција за одреден лек, да потврдат променета фрекфенција на појавување на веќе утврдена несакaна реакција од одреден лек, идентификување на несакана реакција која се јавува само кај одредена популација на пациенти, откривање на интеракции, потенцијални медицински грешки, злоупотреба, погрешна употреба итн. Врз база на евидентираните податоци и идентификување на новите сознанија поврзани со безбедноста на лековите, Агенцијата за лекови и медицински средства (МАЛМЕД) може да преземе мерки со кои ќе обезбеди сигурност дека лекот ќе биде користен на начин со кој се минимизира ризикот и се потенцира користа од истиот.
